На 02.02.2023 година по повод 4 февруари – Светскиот ден на ракот, се одржа предавање на тема: „Информирај се колку е битно женското здравје“. За таа цел беше присутен специјалистот гинеколог и акушер, д-р Михајло Вангелов. Во позитивна, опуштена и пријателска атмосфера заедно со присутните разговараше на повеќе теми поврзани со женското здравје, а со цел превенција од рак на женските органи. Докторот повеќепати ја нагласи потребата од редовна посета на гинеколог, односно еднаш годишно. За време на работилницата, зборуваше на повеќе теми и тоа:
- кога за првпат треба да се посети гинеколог;
- важноста на матичниот гинеколог и бесплатните услуги кои следуваат со тоа;
- ризици од добивање на рак на дојка, матка, грло на матка и јајници, начин на ширење и превенција на истите;
- важноста на улогата на мајките во подготвување на своите ќерки за менструалниот циклус, следењето на циклусот и правилната хигиена за време на циклусот;
- вистините и митовите околу толкувањето на невиноста кај девојките поврзани со различните типови на химен;
- достапните контрацептивни средства и начинот на употреба.
Присутните отворија и дополнителни теми и дискусии со нивните прашања, како што се полицистичните јајници, причини за разни физички и ментални нарушувања кај бебињата псоле пораѓајот, постпородилната депресија, појавата на апцеси заедно со начинот на третирање и слични теми.
Активноста е поврзана со специфичните цели 1.1, 1.3, 1.6 од Здравствениот локален акциски план за Роми кој е веќе усвоен од Општина Битола.
