Почина Владимир Костов, битолскиот писател, професор и почесен член на МАНУ на 90 годишна возраст по долго боледување. Опелото и погребот ќе бидат на 4 јануари, во храмот „Св. Недела“ во Битола.
Костов беше тивок човек, а пишувајќи одѕвонуваа камбани. Тој ја познаваше душата на Битола, ја знаеше нејзината кокетна страна, грдата страна, ѝ направи целосна анамнеза на нејзината духовна страна.
Костов претставува интелектуална и книжевна грамада каква што се раѓа една на 100 години во светот, а ние ќе бидеме среќни ако следните 100 години како битолчани добиеме негов наследник – продорен, кроток, одмерен во секој збор.
Костов беше мајсторот на кусиот расказ. Раскажувач од светски рамки.
Неговите романи како: „Црквичето 40 маченици во Битола“, култниот роман „Свадбата на Мара“, „Учителот“, „Грешниот Захарија“, „Нов ум“, „Битолски триод“ и уште многу други воодушевуваат со нивната единственост и оригиналност.
Костов беше професор на Педагошката академија во Битола, од каде што и замина во пензија.
Беше носител на повеќе награди.
Според неговите романи „Свадбата на Мара“, „Грешниот Захарија“ покојниот режисер Љубиша Ѓеорѓиевски ги постави театраските претстави на репертоарот на Битолскиот театар, а претставата „Црквичето“ ја постави Љупчо Ѓеорѓиевски – Бубе.
Оваа година по повод неговиот 90-ти роденден неговото семејство го реиздадоа романот „Црквичето 40 маченици во Битола“.
Споменот за писателот Владимир Костов е жив, тој е битолскиот Кркардаш, соединување на истокот и западот, на христијанството и исламот. Костов остави зад себе книжевност која е национално книжевно богатство – но, книгата вреди само ако се чита.
Интернет врска од театарската претстава: „Црквичето“ во режија на Љупчо Ѓеорѓиевски – Бубе :
