Доајенот на битолскиот народен театар, Митко С. Апостоловски денеска на 67-годишна возраст го напушти земниот свет и замина кон вечните височини.
Митко имаше еден несекојдневен, далеку препознатлив продорен глас кој само го надополнуваше неговиот огромен актерски талент. Надополнет со неговата единствена појава заедно со смиреноста која беше негова одлика, остави огромен печат не само врз битолскиот театар, не само во неговата родна Битола, туку и врз македонската кинематографија со неповторливите улоги во филмовите како што се: „Трето полувреме“, „Големата вода“, „До балчак“ и уште многу други. А улоги…од Димитрија, до Ристо, неколку улоги како поп…На сцената на битолскиот театар пак брилијантен во секоја можна претстава…а нив, ги имаше многу…
Не секој можеше да остане рамнодушен на неговите прераскажувања во Македонските народни приказни, со неговиот глас им даваше душа, за секој да може да се соживее со случките, поуките, мудростите кои тој ни ги раскажуваше.
Водител на безброј манифестации во Битола, неговиот глас го слушавме и ќе го слушаме и понатаму во различни документаци.
Битолскиот театар денеска се прости од него.
Митко С. Апостоловски е роден на 7 март 1955 година во Битола. Дипломирал на Вишата музичка школа во Скопје (Отсек за драмски актери). Почнал да работи во Народниот театар во Битола (1973–1974) и во Народниот театар во Куманово (1980–1995). Од 1995 г. е повторно во Народниот театар во Битола. Улоги: Фезлиев („Црнила”); Војдан („Тетовирани души се враќаат дома”); Креонт („Медеја”); Дидро („Развратникот”).
Слава му!
