Во чест на месецот на менталното здравје, битолскиот музичар Дејан Нашоку со голема искреност и емоција го најавува својот четврт студиски албум под наслов „Pain, Devour Me“ – дело што претставува силна уметничка изјава за тивката болка која многумина ја носат.
Меѓу песните на албумот, се издвојува „Flying To Sleep“, чиј текст Дејан го напишал уште во средношколските денови. Песната е посветена на сите што ја изгубиле битката со менталната болест, како и на оние кои и понатаму се борат – тивко, далеку од очите на јавноста.
„Оваа песна е за оние кои живеат со депресија, а никој не знае. За оние што виделе светлина на крајот од тунелот и успеале. Но и за оние што водат внатрешна војна, која никој не ја гледа“, вели Дејан.
Преку „Pain, Devour Me“, Дејан испраќа порака за освестување и емпатија – особено во време кога темата за менталното здравје сè уште често се игнорира или стигматизира.
„Прашајте ги вашите блиски како се. Не само формално. Слушајте ги. Помогнете каде што можете. Понекогаш и најмал гест може да направи огромна разлика“, додава тој.
Новото издание на Дејан Нашоку се очекува да биде длабоко лично патување низ болката, загубата и надежта, со музика што лекува, отвора дијалози и носи свест.
