Стрелците од Битола остварија одличен успех на Државниот натпревар во стрелаштво за основни и средни училишта, освојувајќи вкупно пет медали во машка и женска конкуренција.
На натпреварувањето, организирано од Федерацијата на училишни спортови, со поддршка од МССФ, битолските натпреварувачи покажаа одлична подготвеност, прецизност и спортски дух, што резултираше со неколку високи пласмани.
Во конкуренција на основните училишта, Димитар Каровски го освои второто место, додека Никола Кукановски се пласираше на третата позиција во машка конкуренција. Кај девојчињата, Тамара Русевска го освои третото место.
Успешни беа и средношколците. Андреј Велјаноски го освои првото место во машка конкуренција, а Вања Арсиќ заврши на втората позиција.
Од ГСК „Пелистер“, кој заедно со ОСУС Битола вложи напори за учеството на натпреварувачите, истакнуваат дека овие резултати се потврда за посветената работа и континуираното вложување во младите стрелци и развојот на стрелаштвото во Битола.
Воедно, упатија честитки до организаторите и сите учесници за постигнатите резултати и покажаниот спортски дух, а посебна благодарност изразија до општествено одговорните компании и пријатели кои со својата поддршка придонесуваат за развојот на стрелаштвото во градот.
