Ученици од Гимназијата „Јосип Броз Тито“ во Битола ја претставуваат својата иновативна идеја „Светки“ на натпреварот „Средношколец милионер“. Станува збор за енергетски тепих кој со помош на пиезоелектрична технологија ја претвора енергијата од човечките чекори во електрична енергија.
Проектот е наменет за училишта, трговски центри и други јавни простори со голема фреквенција на движење, каде што создадената енергија може да се складира и да се користи за напојување на LED-светилки, сензори и други уреди со мала потрошувачка. Целта е секојдневното движење на луѓето да се претвори во корисен и одржлив енергетски ресурс.
Зад проектот стојат ученичките Стефанија Димовска, Ања Грамосли, Јана Василевска, Деа Атанасов и Дафина Дуковска, кои преку својата идеја сакаат да придонесат кон подигање на свеста за обновливите извори на енергија и заштитата на животната средина.
За поддршка на оваа млада и креативна иницијатива, граѓаните можат да го посетат проектот „Светки“ на платформата „Средношколец милионер“ и да го дадат својот глас.
