Александар Ортаковски е млад моден дизајнер кој неодамна се појави на модната сцена со воодушевувачки, уникатни, елегантни и невообичаени модни парчиња и креации, познати под името ТАО, а тоа е името и на самиот бренд на Александар, основан минатата година. Тој со помош на уникатност, чувство за естетика и доза иновативност се најде на страниците на Vogue, со модната креација, позната под името ,,TAO lace shirt”.
Vogue е еден од најпознатите, светски и интернационални модни магазини кој ја диктира модата во светот. Да се биде дел о магазинот претставува огромна награда и признание за талентите чија пасија е дизајнот, фотографиите, модата и креациите. Александар вели дека за овa сонувал од мал и тврди дека соништата не се само соништа, туку дека тие се реализираат со силна верба, труд, упорност и работа.
,,Нема зборови со кои може да се опише чувството кога ќе се оствари нешто за кое си мечтаел од мали нозе. Да го прочиташ своето име на страниците на Vogue е неопишливо чувство. Се уште не ми е реално тоа што се случи, и сум преблагодарен за пружената доверба. Срцето ми се исполнува со истата среќа и возбуда, одново и одново, секогаш кога ќе ја погледнам кампањата. Да се најдеш покрај такви светски имиња е неизмерно голема сатисфакција, но и одговорност. Соништата се остваруваат, а љубовта кон работата и трудот секогаш се исплаќаат” – констатира Александар за Читај бе.
Навистина е тежок и макотрпен патот да се допре до еден од светските модни диктатори како што е Vogue, но не и невозможно. Александар Ортаковски од Битола ни докажа и покажа дека младиот човек кој работи на своите соништа, подоцна тие и ги живее.
,,Не постои личност која би ја пропуштила шансата за соработка со гигант како Vogue, јас сум преблагодарен за таа можност, ја искористив максимално и се надевам дека ова е само почеток.
Јас како дизајнер со мојот бренд ТАО секогаш ставам акцент на уникатноста, иновативноста и естетиката, иако неможам со точност да тврдам, но мислам дека тоа беше пресудно кај стилистите во Vogue да одлучат токму ТАО да се најде во најновото издание на магазинот” – изјави Ортаковски.
