Пелагонското село Црнобуки е вистински бедем на христијанството. Минатата година беше изграден 10 метарски крст пред храмот „Св. Димитрија“.
Оваа година е поставена и божиќна пештера спроти најрадосниот празник за православните христијани, раѓањето на Господ Исус Христос – Божик.
Божикната пештера на мештаните им ја подари Епископот Антаниски г. Партениј од Бигорскиот манастир.
На својата територија има три православни храма: централно е изградена веќе споменатата црква „Св. Димитрија“ изградена 1866 година. Под селото , сместено на ритчето се наоѓа манастирот „Св. Атанасиј“ кој бил осветен во 1984 година, а во изградба е уште еден манастир посветен на Вознесението Христово „Св. Спас“.
Црно Буки е оддалечено од Битола 10 километри. Таму живеат околу 300 жители.
Ова македонско село е вистински конгломерат на македонски обележја.
Во Црнобуки има повеќе археолошки локалитети кои се неми сведоци на развојот на животот од најрана доба: од железно доба, антички период, римски период, неолитско и бакарно време.
Неофицијално, некои археолози во ареалот на Црнобуки го лоцираат градот на царот Персеј, син на Филип V – Персеида, како доказ се зема мозаичниот камен кој е најден во атарот на селото.
Селото одигрално значајна револуционерна улога за време на отоманскиот период и Првата светска војна.
