Битола ова лето ќе биде домаќин на уникатен спортско-забавен настан кој за првпат се организира во Македонија – „Пивска милја“. Настанот ќе се одржи на 31 јули во Градскиот парк во Битола и ветува несекојдневно искуство за сите љубители на рекреацијата, пивото и добрата забава.
Станува збор за натпревар кој комбинира трчање и консумирање пиво, концепт популарен во повеќе земји низ светот, а сега за првпат ќе биде претставен и пред македонската публика.
Учесниците ќе треба да совладаат патека долга 1.600 метри, додека во текот на трката ќе имаат и дополнителен предизвик – вкупно 1.600 милилитри пиво до финишот. Организаторите најавуваат дека покрај спортскиот дел, посетителите ќе можат да уживаат и во богата забавна програма со бројни активности пред и по трката.
За најуспешните натпреварувачи се предвидени оригинални награди – литри пиво, а организаторите најавуваат одлична атмосфера, дружење, музика и многу смеа.
„Пивска милја не е само трка, туку и најзабавниот after-work собир во градот. Не мора да учествувате за да бидете дел од приказната. Дојдете со пријателите, навивајте за натпреварувачите и уживајте во вечер исполнета со позитивна енергија“, порачуваат организаторите.
Настанот е отворен за рекреативци, љубители на пиво, спортски ентузијасти и сите кои сакаат да бидат дел од нешто поразлично и несекојдневно.
Дополнителни информации за пријавувањето, стартот на трката и целосната програма ќе бидат објавени наскоро.
На 31 јули, Битола ќе покаже дека кога битолчани ќе посакаат – можат и да трчаат и да пијат, истовремено.
