Здружението за афирмација на културата, екологијата и руралниот туризам „Културен манифест“ – Крушево, како дел од своите долгорочни програмски активности, на 31.05.2025 година го основа првиот литературен круг во Општина Крушево, кој ќе го носи името на еден од најголемите македонски драмски писатели – крушевчанецот Васил Иљоски.
Васил Иљоски (1902–1995) е еден од основоположниците на македонската драмска книжевност. Роден во Крушево, тој остави трајна трага со своите драми на народен јазик, меѓу кои најпозната е „Бегалка“. Неговото творештво ја афирмираше македонската култура во тешки историски околности и претставува столб на националниот драмски израз.
Како составен дел на литературниот круг функционира и читателски клуб, со членови од Крушево, Битола и други градови низ Македонија. Основната цел на овој круг е популаризација на литературата во целина, преку објавување на годишни трудови, организирање читателски и книжевни средби, доделување признанија на реномирани автори и дебитанти, како и поттикнување на книжевната култура кај младите преку разни конкурси и активности.
За прв претседател е избран Валентин Тасески.
