Во Битола ќе се одржи 17- то издание на Балканскиот етно-фјужн фестивал „Локум фест-музика и традиција“ 2023.
Локум фест 2023 започнува на 18.07 на платото на Офицерски дом со промоција на новиот албум на старите пријатели на фестивалот, групата „Баклава“ во 20.30 ч. во Офицерски дом-КИЦ Битола, за да продолжи вечерта со музиката која доаѓа од соседна Грција и Loxandra Ensemble – Λωξάντρα во 21.30 ч.
Оваа година за прв пат има Локум фест-ОФФ Програма , првата вечер во Вино бар Буре на Магнолија со Баклава и гостите од Грција.
„Нашата пасија за откривање на традиционалните музички спомени и звуци на конзулска Битола, ни ги носи нашите „битолчани“ од Њујорк, Elias ladino ensemble, а соработката со Државниот архив-одд.Битола ни донесува прекрасна изложба на фотографии од музичкиот живот на битолските евреи. Втората вечер ја затвораме со познатиот македонско-словенечки мајстор на саксофон Васко Атанасовски и промоција на неговиот албум на балканска музика„Мелем“ со пејачката Добрила Грашеска“, вели Тоше Ивановски, организатор.
Дружбата продолжува во Хотел Театар со ладино музика, поезија, закуска, дружба…Последната вечер на 20.07 е резервирана за старата битолска чаршија каде ќе се случува фестивалското „крешендо“.
„Ќе се распостелиме покрај пешачката улица крај Драгорот, со ракотворби, локуми, турско кафе, добра храна и радост…Ќе уживаме во мајсторијата на Вевки Амедов и неговите „Јужни звезди“, славејќи ја ромската култура, а токму оваа вечер ги имаме специјалните гости од партнерскиот фестивал Резонатор од Данска кои со поддршка на MOST music ги имаме во Битола. Групата „Ypek Yolu“ или патот на свилата е харизматична спојка на традиционална анадолска народна музика и фанк фјужн, музика која има една единствена цел-да ве разигра и опушти…“, вели Ивановски.
Традиционално на сите три фестивалски вечери ќе бидат присутни ЗУР Македонски ракотоворби , крушевски и битолски локум, со презентации на рачно изработени производи и секако кафе.
