Во најубавиот дел од градот, на познатиот Широк Сокак, годинава по 21 пат се одржа традиционалната манифестација „Во срцето на Битола“, во организација на ЗУР „Македонски ракотворби“. Две седмици Битола живееше во ритамот на културата, уметноста и традицијата, привлекувајќи илјадници посетители од цела Македонија и странство.
Манифестацијата беше вистинска ризница од активности – обуки на различни теми, креативни работилници за ракотворби во уникатни техники, саем, фолклор, фотографии кои ја раскажуваа приказната за градот. Посетителите имаа можност да се запознаат со автентични македонски занаети, да научат нешто ново и да понесат дел од нашето културно наследство дома.
Шаренилото на боите и уникатните ракотворби создадоа волшебна атмосфера на Широк Сокак, претворајќи го овој дел од градот во отворена сцена за креативност и пријателство.
Организаторите од ЗУР „Македонски ракотворби“ велат дека се горди на успешната реализација на уште едно издание и дека веќе ги започнуваат подготовките за следната година. Целта останува иста – да се зачува, промовира и пренесе македонската традиција на идните генерации, во срцето на градот каде што културата секогаш живее.
