Со настапот на реномираниот француски џез пијанист Laurent Coulondre, синоќа во Народниот театар во Битола свечено беше отворено осмото издание на Џез Фактори фестивалот, кое годинава се одржува од 16 до 19 април.
„Изминатите години беа тешки, а и сега не е лесно – уметноста секогаш се соочува со предизвици. Но ние не се откажуваме, се бориме и ќе се избориме. По десеттото издание, кога ќе броиме двоцифрено, ќе ни биде уште полесно“, истакна на отворањето директорот и основач на фестивалот, проф. Сашо Поповски.
Минатата година фестивалот беше избран од престижна светска асоцијација од Шангај, Кина, како единствен претставник од Македонија, што дополнително го зацврсти неговиот углед.
Laurent Coulondre, познат по својот иновативен пристап, е добитник на бројни награди и соработувал со истакнати музичари како Paul Jackson и Pierre de Bethmann. По настапот, со воодушевување изјави:
„Навистина уживав. Публиката беше фантастична, енергична и жедна за добар звук. Тоа ме инспирираше. Фестивалот е одлична можност да се патува, да се слави музиката – вистински подарок е да се биде тука, да се почувствува љубовта кон џезот“.
По Coulondre, на сцената настапи американскиот бенд Working Class Heroes, предводен од мултиинструменталистот Corey Wilcox – долгогодишен член на Jazz at Lincoln Center Orchestra, со настапи на светски сцени како Carnegie Hall и Newport Jazz Festival.
Еден од членовите на бендот, Кристијан Џорџевиќ, рече:
„До поканата дојде преку долгогодишната соработка со Поповски, со кого често соработувам. Така го составивме овој бенд од луѓе со различно музичко искуство – токму затоа го носиме името Working Class Heroes“. Ваквите настани се одлична платформа за промоција и поврзување. Колку повеќе фестивали се вмрежат, толку поголем ќе биде интересот на јавноста. Нека музиката зборува – Let the music do the talking“.
Вечерната концертна програма започнува во 20:00 часот со настап на триото на пијанистот Jaume Miquel од Шпанија, кое претставува спој на традиционален и модерен џез. Од 21:00 часот следува настапот на Swantje Lampert, а од 22:00 часот, на сцената во пабот Бурбон Стрит ќе настапи квартетот на македонскиот џез пијанист Јован Цветковиќ, кој носи свеж, современ звук инспириран од класичниот џез.
Фотограф: Александар Георгиев
