Втората вечер на „Џез Фактори“ фестивалот во Битола беше резервирана за настапот на триото на пијанистот Jaume Miquel од Кралството Шпанија. Триото комбинира традиционален и модерен џез, а неговите членови се искусни музичари кои имаат настапувано со џез великани како Kurt Rosenwinkel и Dave Holland.
Фотограф: Александар Георгиев
По нивниот настап следуваше изведбата на саксофонистката и композиторка Swantje Lampert, која во текот на денот одржа и работилница со млади џез музичари. Нејзината музика претставува инспиративен спој на класичен и современ џез стил.
Последниот ден од фестивалот е резервиран за Годишната конференција на Асоцијацијата на џез фестивали, со цел размена на искуства и поддршка на европскиот џез. Конференцијата се реализира во соработка со Здружението Пелагонија, како платформа која создава нови можности за уметници, организатори и публика.
Во 20 часот, во Битолскиот народен театар, ќе биде доделена наградата „Гоце Димитровски“, која се доделува во чест на еден од најзначајните македонски џез музичари. Целта на ова признание е да поддржи и инспирира нови генерации џез артисти.
Оваа година, наградата оди кај Теодор Јаневски, дипломиран џез тапанар од Џез одделот на Музичката академија при Универзитетот „Гоце Делчев“ – Штип.
Наградата традиционално се доделува во соработка со Општина Битола.
Досегашни добитници на наградата „Гоце Димитровски“:
- 2020: Александар Ванчовски – тапани
- 2021: Филип Динев – гитара
- 2022: Александар Бошков – гитара
- 2023: Јован Цветковиќ – пијано
- 2024: Давид Скерлевски – пијано
Концертната програма започнува со КОД 369 – битолски џез-фјужн проект со модерен звук и иновативни композиции. Бендот, ексклузивец на најреномираната хрватска издавачка куќа Кроација Рекордс, стекна популарност со својот деби албум и уникатниот пристап кон џез музиката.
Потоа следува настапот на JFF Little Big Band под диригентство на Тони Китановски од Македонија – проект на Џез Фактори фестивалот, кој изведува композиции на истакнати македонски џез автори. Под негово водство, ансамблот обединува некои од најталентираните млади македонски џез музичари.
