Започна 16-то издание на Балканскиот етно-фјужн фестивал „Локум фест-музика и традиција“ 2022 кое се одржува во рамките на Бит Фест.
Локум фест е фест е првата фестивалска манифестација во Македонија која својот зародиш го има во старата битолска чаршија, како обид да се сврти вниманието кон истата. Битолската чаршија синоним за занаети, еснафи, мултикултурализам и секако за кафе со локум како синоним за средба, со години се празни, а објетите ги јаде времето. Амбиенталната архитектура, сведок на едно време, се повеќе се стилизира или распаѓа, а со тоа и нашата врска со минатото. Оттаму и е мотивот и идејата за фестивал кој ќе ги спои во еден концепт: музиката, традицијата, креативните индустрии и културното наследство.
Фестивалот започна вечерва, 21.07 на платото на Офицерски дом со македонската етно група „Монистра“ кои одбележуваат 20 години постоење, а продолжи со фантастичните момци од Бретања-Франција, PLANTEC , чиј што звук е спој на традиционална и електронска музика.
Интересен ќе биде утрешниот настап (22.07) со играње и пеење на балканска музика со познатата храватско-шведско-македонска група „Афион“. Во сабота пак, традиционално фестивалот се сели во старата битолска чаршија каде се предвидени работилници за музичко новинарство и промоција на магазинот „Етноумље“, со гостите од Србија, како и Саем на ракототворби со ЗУР „Македонски ракотоворби“ и изложбата подготвена од Државен архив – одделение Битола, насловена како„Данабаш низ архивскиот материјал – Раскошот и проклетството“.
Музичкиот дел ги носи и чуварите на традицијата, Пензионерското пејачко друштво „Сирма Војвода“ од Битола, тајфата „Антико“ и специјалните гости, бендот „Gipsy Groove“.
Музичкиот концепт е јасен во својата намера да промовира македонски ансамбли кои негуваат стилови на традиционална музика за што сведочи долгата листа на досегашни учесници како: Чалгија саунд ситем, Баклава, Љубојна,Тони Китановски и Черкези, Кинг Велинов и Кочани оригинал оркестар,Вања Лазарова, Драган и Ратко Даутовски, Влатко Стефановски…Од региониот на Локум фест настапиле бројни ансамбли од етно-фјужн музика од Унгарија Полска,Словенија, Србија, Хрватска, Албанија, Грција, додека светските имиња доаѓаат од Индија, Египет, Јапонија, Бразил, Данска, Шведска, Финска и др.
