На 27 и 28 октомври, со почеток во 20 часот, на големата сцена на Центарот за култура – Битола, публиката ќе има можност да ја погледне „Медеја МК“ со Валентина Грамосли, сценско читање на митот за Медеја што ги спојува театарот, музиката, поезијата и аудиовизуелните елементи во единствена сценска целина.
Создадена според „Medeamaterial“ на Хајнер Милер, со поезија на Ана Бунтевска и песни на Марјан Неќак, претставата отвора простор за длабоки прашања и размислувања за човекот, неговите чувства и внатрешни конфликти, кои продолжуваат да одекнуваат и по завршувањето на сценското доживување.
Адаптацијата, режијата, аудиоинсталацијата и музиката се на Марјан Неќак, кој преку спојот на различни уметнички изрази создава современо сценско толкување на познатиот мит.
Авторски тим:
- Според „Medeamaterial“ на Хајнер Милер, поезија на Ана Бунтевска и песни на Марјан Неќак
- Превод: Наташа Аврамовска и Елена Китановска – Ристовска
- Сценографија: Марјан Неќак и Сергеј Светозарев
- Видеопроекции: Сергеј Светозарев
- Инспициент: Александар Црвенко
- Тон-мајстор: Тони Тошевски
- Видеооператор: Владимир Пераловски
- Дизајн на светло: Никола Ѓеорѓиевски
- Дизајн на плакат: Сашо Илковски
„Медеја МК“ е сценско доживување што ги поврзува класичниот мит и современиот уметнички израз, нудејќи поинаков поглед кон приказната за Медеја и темите што таа ги отвора.
