Кога квалитетот, посветеноста и љубовта кон музиката се спојат, резултатите се неизбежни. Фестивалот ТРА ЛА ЛА, кој со години претставува расадник на млади музички таленти, повторно ја потврди својата мисија – да им отвора врати на децата кон светската сцена.
Еден од најубавите примери за тоа е деветгодишната Евгенија Ристевска, која веќе три пати настапи на фестивалот ТРА ЛА ЛА, секогаш покажувајќи талент, напредок и сценска зрелост. Благодарение на поддршката од организаторите и стекнатото искуство, таа од 22 до 25 мај 2025 година за првпат учествуваше на меѓународен фестивал во Валона, Албанија, каде што освои високо второ место во својата категорија!
Во силна конкуренција со учесници од Албанија, Романија, Косово, Унгарија, Канада и други земји, Евгенија со песната „Летни авантури“ ја освои поддршката на меѓународното жири и заслужено се искачи на победничкиот пиедестал. Нејзиниот ментор Тони Алексовски, кој беше и раководител на македонската делегација, воедно беше и член на интернационалната жири комисија.
Ова гостување претставува 59-то учество на ТРА ЛА ЛА и MUSICLAND на големи меѓународни фестивали – импресивен доказ за нивната континуирана работа и ангажман.
Како што изјави директорот на фестивалите, Тони Алексовски, овој успех не е само лична победа за Евгенија, туку и силен доказ дека ТРА ЛА ЛА не е само фестивал, туку вистинска платформа што го препознава, негува и промовира младиот музички потенцијал. Благодарение на визијата и трудот на тимот што стои зад фестивалот, многу деца добиваат шанса да се изразат, да растат и да бидат забележани на поширока сцена.
Со срце исполнето со благодарност, им честитаме за визијата, посветеноста и поддршката што ја даваат на секое дете кое зачекорува на сцената на ТРА ЛА ЛА – сцената што ги води кон светот.
Честитки за Евгенија Ристевска! Посакуваме уште многу награди и успешни настапи!
