На 02.04.2026 година, во ОУ „Елпида Караманди“ – Битола, се одржа едукативна работилница посветена на значењето на водата. Настанот беше организиран од Инервил клуб Битола, со поддршка на ЈКП Водовод Битола.
Работилницата е дел од интернационалниот проект „Водата е живот – чувај ја водата, чувај ја иднината“, во кој учествуваат клубови од Турција, Северен Кипар и Бугарија.
Учениците блеснаа со својата креативност преку рецитали, драматизации и интересни презентации, испраќајќи силна порака за заштита на водните ресурси.
Посебен акцент беше ставен на стручниот дел, каде вработените од ЈКП Водовод Битола – технологот Лела Ацевска и инженерот Александар Велјановски – ги презентираа процесите на преработка и контрола на водата за пиење, како и новите инвестициски проекти на претпријатието.
