Велосипедскиот клуб „Пелистер 15 ти мај“ од Битола учествуваше на „Купот Агим Тафили 2023“ во Скадар, Албанија. Купот се одржа на 5-6 мај во категорија U23 Elite/Junior. Првата етапа беше во должина од 122.6 км, додека втората се возеше во должина од 108 км. За велисипедскиот клуб „Пелистер 15 ти мај“ од Битола учествуваа Кирил Марковски и Петар Трајкоски придружувани од тренерот Африм Јусуфи.
Екипата на Читај бе имаше можност да присуствува на двете трки заедно со тимот на Велосипедскиот клуб „Пелистер 15 ти мај“ и од прва рака да види како се организира една меѓународна велосипедска трка заедно со сите елементи кои се потребни за успешно и безбедно да се одвива и да заврши трката.
Организаторот, Албанската велосипедска федерација, беше на ниво на задачата, со многу високо ниво на организацијата, но и на безбедност која е од огромно значење за самите велосипедисти кои ја возат патеката, кои во еден момент, на надолниот дел од патеката развиваа брзина и до 90 километри на час. Исто така, втората етапа од трката се одвиваше во ридско-планински дел, кој изобилуваше со многу свиоци, но и стрмни угорнини. Ваквата патека е голем предизвик за велосипедистите, па затоа тука од големо значење е и придружбата која со автомобил вози зад нив и во секое време ги обезбедува со вода, храна и се што е потребно за време на трката. Исто така, оваа патека беше уживање заради планинскиот предел, но и глетката кон Скадарското езеро.
Инаку, купот во Скадар беше подготовка за големата трка која што наскоро ќе се одржи, Тур де Албанија.
Фотограф: Саше Богоевски
