По повод Светскиот ден на науката за мир и развој, Универзитетот „Св. Климент Охридски“ – Битола ја организираше четвртата Годишна меѓународна конференција на тема „Мултидисциплинарен пристап кон целите за одржлив развој“, која се одржа во КИЦ „Офицерски дом“ во Битола.
Научниот собир обедини академици, истражувачи и креатори на политики од земјата и странство, со цел размена на знаења и искуства, поттикнување на соработката и креирање иновативни решенија за одржлива иднина.
На свеченото отворање се обратија ректорот на УКЛО, проф. д-р Игор Неделковски, проректорот проф. д-р Горан Илиќ и постојаната координаторка на Обединетите нации во земјава, Рита Колумбија. Во своите обраќања ја истакнаа водечката улога на УКЛО во промовирањето на Целите за одржлив развој, како и значењето на мултидисциплинарниот пристап и меѓународната академска соработка.
Годинешната програма ја вклучи и алијансата SustainED, а главното предавање го одржа проф. д-р Лефтерис Топалоглу од Универзитетот на Западна Македонија во Кожани, Грција посветено на влијанието на зелената енергија и енергетската транзиција врз пазарот на трудот.
На конференцијата беа презентирани околу 70 научни трудови, избрани од повеќе од 100 пристигнати пријави. Во рамките на придружната програма се одржа и мастеркласот „Одржливата иднина се создава поинаку од денес“, при што беа промовирани новите студентски изданија „УКЛО КОЛОРС Магазин“ и „Калеидоскоп“.
