Со настапите на битолскиот џез-фјужн состав КОД 369 и JFF Little Big Band под диригентство на Тони Китановски, синоќа свечено беше заокружено осмото издание на Џез Фактори фестивалот во Битола. Завршната вечер беше вистински празник на домашниот џез израз, каде модерните текови и локалната џез естетика се споија во моќна музичка експлозија.
Публиката најпрво уживаше во оригиналниот звук на КОД 369, состав познат по своите иновативни композиции и модерен пристап кон џезот. Како ексклузивци на „Кроација Рекордс“, бендот успешно гради препознатлив музички печат што ги надминува границите на регионот.
Фотограф: Александар Георгиев
Круна на вечерта – и на целото фестивалско издание – беше настапот на JFF Little Big Band, фестивалски проект кој под диригентската палка на реномираниот гитарист и композитор Тони Китановски, обединува дел од најталентираните млади македонски џез музичари. Ансамблот изведе композиции од истакнати македонски автори, претставувајќи свежа и моќна перспектива на домашната џез сцена.
Осмото издание на фестивалот остави силен впечаток со богата и разновидна програма, спојувајќи уметници од Франција, САД, Шпанија, Германија и Македонија, и уште еднаш потврди дека Битола станува значајна точка на џез картата на Балканот.
