Од 21-28.12.2024 во изложбениот салон на ДЛУБ ќе биде отворена изложбата на Билјана Толевска Наумовска која е родена на 5 мај 1992 година во Битола. Таа е дипломиран психолог на Меѓународниот Славјански Институт. Од 2016 година редовно посетува часови по цртање и сликање во „Ателје Солак“, под менторство на академскиот уметник Димитар Солаковски.
На оваа изложба се претставени триесетина дела, изработени во техника акварел и туш на хартија, кои претставуваат мал, но значаен дел од нејзиното шестгодишно творештво. Овие дела се интимни рефлексии на романтични мисли, каде што уметноста и психологијата се среќаваат и заедно го истражуваат минливото и единственото во секојдневието.
Преку мали кадри и исечоци, авторката пренесува замислени пејсажни композиции, инспирирани од илјадниците визуелни прикази кои секојдневно ги апсорбираме преку мас-медиумите.
