Свети Атанасиј Велики е еден од најзначајните христијански светци и се смета за голем бранител на вистинското православие. Православната црква го чествува неговото име двапати во текот на годината: на 31 јануари – како зимски празник, и на 15 мај – како летен ден посветен на пренесувањето на неговите мошти и чудата поврзани со нив.
Свети Атанасиј е заштитник на многу домови и семејства. На овој ден свој именден го слават: Атанас, Атанаска, Танас, Танаска, Тане, Насе, Насте…
Роден е во 296 година во Александрија, каде уште од најмлади години покажувал голема љубов и ревност кон верата. Одредено време минал во пустината заедно со свети Антониј Велики, каде што се зацврстил во духовниот подвиг. По враќањето, бил поставен за архиѓакон на александриската црква, а подоцна учествувал и на Првиот вселенски собор, каде се истакнал со своето знаење на Светото писмо и дарбата за јасно и моќно говорење.
На барање на народот, бил избран за архиепископ на Александрија, функција на која останал со децении. Но, поради неговото влијание и храбро застапување на православната вера, бил четири пати прогонуван од различни цареви. Вкупно дваесет години од животот ги поминал во прогонство, но никогаш не отстапил од своите уверувања.
Се упокоил во 373 година, оставајќи длабок белег во историјата на христијанството.
