Под отворено небо во магичниот Пацио на НУ Завод и Музеј Битола, со солистички концерт на македонскиот композитор и пијанист Кокан Димушевски, започна 19-то издание на Балканскиот етно-фјужн фестивал „Локум фест – музика и традиција 2025“.
Фотограф: Саше Богоевски
Димушевски е еден од најзначајните автори на музика за театар во Европа и САД, со над 1.500 минути компонирана музика за сценски дела, аудиодизајн за бројни радио и ТВ станици, повеќе од 1.000 концерти низ целиот свет, соработки со Yamaha и Radio France International, дваесетина издадени ЦД и ДВД албуми, и долга кариера како музички продуцент во МРТ.
Локум фест е единствен фестивал од ваков вид во Македонија и на Балканот – мост меѓу традиционалната градска музика и современите звуци на fusion & world music. Во изминатите 18 изданија, фестивалот има реализирано над 110 концерти со уметници од Македонија, регионот и светот.
