Новата премиера „Секстет“, трета по ред од годишната програма за 2026 година, во режија на Марјан Георгиевски, на Битолскиот театар.
Премиерата е закажана за 25 април и веќе е целосно распродадена, додека првата реприза ќе се одигра на 27 април со почеток од 20 часот.
Директорот на театарот, Васко Мавровски, истакна дека по пауза од 25 години на сцената повторно се враќа водвиљот. „Имаме претстава која недостасуваше на репертоарот. Се обидуваме да ѝ го понудиме на публиката она што сака да го гледа и мислам дека сме на вистинскиот пат“, рече Мавровски, посочувајќи дека интересот е значително зголемен и дека претставите сè почесто се распродаваат онлајн.
Режисерот Георгиевски нагласи дека за неговата генерација водвиљот бил жанр што ретко се поставувал, што го прави процесот уште повозбудлив. „Комедијата изгледа лесно, но е исклучително прецизна и тешка за работа. Секој момент мора да биде точно поставен“, рече тој.
Претставата е адаптација на делото на Марк Камолети „Не се дотерувај за вечера“, автор познат по своите динамични и духовити водвиљи кои се играат ширум светот.
Во актерската екипа се Николче Пројчевски, Катерина Аневска Дранговска, Александар Димитровски, Сандра Грибовска Илиевска, Марија Цветановска и Борче Ѓаковски.
Актерката Марија Цветановска посочи дека комедијата бара голема дисциплина. „Во комедијата има многу ‘математика’ – ако се испушти еден момент, сè може да се распадне“, изјави таа.
Актерот Никола Пројчевски истакна дека во денешното динамично време, публиката има потреба од ваков тип претстави. „Потребна ни е комедија за да се насмееме и барем накратко да избегаме од секојдневниот стрес“, рече тој.
Костимографијата е на Андреј Георгиевски, сценографијата на Влатко Чачоровски, музиката ја потпишува Александар Димовски, а за светло и тон се задолжени Горан Петровски и Николче Терзиевски.
„Секстет“ носи брзо темпо, низа комични ситуации и е создадена како вечер за чиста радост – потсетник дека, во време на постојани кризи и информации, смеата е повеќе од потребна.
