Во срцето на секоја нација, младите се како светилки што го осветлуваат патот кон иднината. Нивната енергија, страст и визија се неопходни за напредокот на општеството. Сепак, кога државата се соочува со катастрофи, било да е природни или предизвикани, често се случува колективниот заборав и корупцијата да ги засенат овие млади животи, оставајќи ги нивните соништа и потенцијали вечно неостварени.
Историјата е полна со примери каде што во општествата брзо се забораваат трагедиите од кои биле погодени. По првичниот шок и тага, по излеаните солзи, се чини дека меморијата на народот избледува, се брише, оставајќи ги жртвите и нивите семејства во сенките на заборавот. Овој феномен не само што ги понижува страдањата, туку и го спречува општеството да учи од сопствените грешки, зголемувајќи ја веројатноста за повторување на истите катастрофи. Народот се сплотува само во тага, само во жалост за да си ја исчисти совеста и животот им продолжува, заборавајќи на оние семејства кои до бескрај ќе жалат за изгубеното. Ќе настапи колективниот заборав и сè што било исто како да не било никогаш, банерите и плакатите со закани и пораки ќе бидат скинати, а општеството ќе продолжи да се богати и да лакоми на туѓите маки и болки.
Корупцијата е како тивок, безбоен отров што го разјадува ткивото на народот. Во моменти на криза, кога системот би требало да биде најсилен и најфункционален, корупцијата го парализира, овозможувајќи злоупотреби, неправди и занемарување на најранливите.
Медиумите, исто така, имаат огромна моќ во обликувањето на јавното мислење и заборавот, повеќе од често ситуацијата е искористена за да се привлече внимание, зголемувајќи ја драматичноста, хиперболизирање преку сензационални наслови и емотивни извештаи.
Младите индивидуалци се токму тие што ги носат најтешките последици од системските процеси и пропусти. Нивните животи полни со потенцијал и соништа, неограничени и инспиративни се сурово прекинати или засекогаш изменети. Секоја загубена млада душа е непроценлива загуба и потрес, рана која никогаш не заздравува.
