РЕК Битола е подготвен за новата грејна сезона, информираше на прес-конференција за новинарите, генералниот директор на РЕК- Битола Пеце Матевски. Тој истакна и дека се завршени ремонтите на Блок 1 и Блок 2 и се преземени се сите мерки за стабилно производство.
Што се однесува за состојбата на јаглен на депонија, според Матевски е на завидно ниво.
„После многу години ја отпочнуваме грејната сезона со околу 500 илјади тони јаглен, односно на главна депонија и помошните депонии. Досега вакво количество на ископан јаглен било само во златното време на РЕК Битола. Имаме 2 милиони откривка на јаглен кој е спремен за експлоатација, 500 илјади тони се веќе ископани и се наоѓаат на нашите депонии, но сепак ќе имаме увоз на јаглен кој е со високо калорична моќност заради да имаме мешање, бидејќи нашиот јаглен кој сега го ископуваме е посиромав и со многу ниска калорична вредност. Ќе набавуваме од Грција и Албанија“, рече Матевски.
На крајот на месецот во погон ќе бидат пуштени трите блока на РЕК Битола.
Во моментот РЕК „Битола“ има нешто повеќе од 2.000 вработени.
Се чувствува дефицит на кадар, во делот на производството и тука според менаџментот на Комбинатот неопходен е кадар со стручно образование.
