АД ЕСМ – Подружница РЕК Битола и годинава активно се вклучи во Саемот за кариера на Факултетот за информатички и комуникациски технологии (ФИКТ) во Битола, кој традиционално се одржува со цел поврзување на академската заедница со реалниот сектор.
На Career Expo 2025, претставници од РЕК Битола се сретнаа со студентите од насоките за компјутерски науки и комуникациско инженерство, каде имаа можност да ги запознаат младите со работата на Комбинатот и можностите што ги нуди за практична настава.
Во рамки на настанот, беше претставен секторот за деловно технички апликации, кој произлегува од службата за Автоматска обработка на податоци, а интересот кај студентите за практична примена на знаењата стекнати на факултет беше исклучително голем.
Претставниците на РЕК Битола остварија и конструктивна средба со продеканката на ФИКТ, проф. д-р Костандина Вељановска, при што се разгледуваше можноста за потпишување Меморандум за соработка, со цел унапредување на партнерството помеѓу индустријата и образованието.
Саемот уште еднаш ја покажа својата вредност како платформа што ги спојува знаењето, искуството и младоста. РЕК Битола изрази задоволство што е дел од ваков настан, кој носи нова енергија и перспективи за иднината на технолошкиот развој во земјава.
