На 17-ти и 18-ти ноември 2022 година, делегација од студенти од Фан С. Ноли Универзитетот – Корча предводени од проректорот проф. д-р Арто Адоли и проф д-р Ирена Никај, како и делегација од Универзитетот на Западна Македонија предводени од проф. д-р Антониос Тосуниди, гостуваа на Педагошки факултет – Битола.
За време на нивниот дводневен престој во Битола, студентите од трите универзитети остварија две работни средби на кои предложија серија интересни активности и идеи кои би можеле да ги организираат на ниво на студентски организации во блиска иднина.
На покана на проректорката за студентски работи при УКЛО, проф. д-р Јасмина Буневска Талевска, студентите присуствуваа на спортски турнири организирани од Универзитетското студентско собрание во универзитетската спортска сала „Павел Шатев“ по повод меѓународниот ден на студентите, 17-ти ноември.
Предводени од деканката на Педагошки факултет, проф. д-р Данче Сивакова Нешковски, дел од професорскиот кадар и студентите од Педагошки факултет – Битола, двете делегации посетија повеќе локации во Битола кои се од културно-историско значење за нашиот град, како НУ Завод и Музеј – Битола, Широк Сокак, Саат кулата и Старата чаршија.
