Град кој им оддава должна почит на своите величини, чествувајќи ги преку преку нивите дела како дел од колективната меморија и идентитет е град кој има иднина. Во Свечената сала на Офицерски дом при КИЦ Битола, беше отворена поставка на делата на битолскиот сликар Стојан Апчевски.
Бројни пријатели, почитувачи, уметници и вљубеници во ликовната уметност дојдоа да одат почит кон овој велик ликовен дух.
На присутните им се обрати директорот на КИЦ Битола, Лили Бошевска, а со посебно видео обраќање од САД, се обрати наследникот на уметникот , внуката Паула Апчевска благодарение на која беше можно поставување на оваа поставка.
За значењето на творештвото на Апчевски осврт даде ликовниот критичар Владо Ѓорески.
„Повеќе од педесетгодишното сликарство во Битола, современо и актуелно, создавано од годините по ослободувањето до крајот на дваесеттиот век, денес, скоро пред исчезнување, без систематски и целосно обработен преглед за сите автори, без галерија – музеј за овој творечки неповторлив феномен. Сликарството на Стојан Апчевски, обид и предлог да се направи една покомплетна ревизија кон ова се поинтересно и позначајно дело кое е рамноправен дел од тие неповторливи, големи денови за културата на Битола.
Битола од крајот на четириесеттите години до средината на девдесетите од минатиот век, оствари богат, современ и актуелен ликовен творечки амбиент, кој што често беше на рамнише на поважните ликовни случувања во југословенските простори. Делото на сликарот Стојан Апчевски иако е дел од тоа севкупно достоинствено, важно и значајно ликовно миље, остана недоистражено, неархивирано, без посериозни толкувања и размислувања. Ова е прв обид да се рехабилитира еден значаен опус кој е дел од тоа неповторливо европско творечко и културно живеење на Битола“, пишува во освртот на Владо Ѓорески за делото на Стојан Апчевски.
