Детското ликовно студио „Свети Кирил и Методиј” Битола кое својата школска година за периодот 2О24/2О25 ќе ја започне со упис на старо – нови членови на 14 и 15 септември 2О24 година, ги доби и резултатите од 2 детски ликовни конкурси на кои беа пратени ликовни дела на нивните членови.
„На 6-тото издание на детскиот ликовен конкурс „Мини рестарт” во Велика Плана – Србија кој во суштина е меѓународна детска ликовна изложба на мал формат [ 15 x 15 см ] Детското ликовно студио “Свети Кирил и Методиј” Битола учествуваше со 6О цртежи на 5О свои ученици.
На конкурсот според организаторот пристигнаа детски ликовни дела од 33 држави кои генерираа фонд на над 6.000 детски ликовни цртежи од кои шест се од нашето студио и ќе се дел од изложбената поставка за оваа година.
Со награди – признанија во категоријата ученици од 4 до 7 годишна возраст се здоби Стефанија Чанџуковска додека во категоријата на ученици од 11 до 14 годишна возраст награди – признанија добија ученичките Бојана Стефановска, Миа Мицевска и Јана Талеска, а во категоријата ученици од 15 до 19 годишна возраст награди – признанија добија ученичките Леа Стерјев и Пенелопа Кочевска.
Ова за нас е значаен успех. Темата беше насловена како „Големото синило” a предизвик беше да се работи на прилично мал формат” – истакна Елена Хаџи-Антоновска – претседателска на Детското ликовно студио „Свети Кирил и Методиј” Битола.
Резултати пристигнаа и од 57. издание на светскиот детски ликовен конкурс од Германија на кој според организаторот пристигнале над 8.000 детски ликовни цртежи од над 25 држави.
„Германија е интересна затоа што конкурсот во своето 57-годишно постоење повеќе од 30 години беше само национален. Детското ликовно студио „Свети Кирил и Методиј” Битола учествуваше со 26 цртежи согласно правилата “еден цртеж од еден ученик” и освои награди – признанија за 17 свои ученици.
Наградени се: Јана Талеска, Фросина и Ана Полизовски, Ромина и Андреа Ресановиќ, Елиф Сулиманоска, Ана Марија Спировска, Андреј Миленковски, Анастасија и Стефанија Димитријовски, Томислав Атанасовски, Бојана Стефановска, Јована Василевска, Миа Мицевска, Маргарита Велјановска, Сирма Спиркоска и Леа Стерјев.
За нас овие награди од двата конкурси се одличен стимул за почеток на новата школска година на Детското ликовно студио „Свети Кирил и Методиј” Битола.
Очекуваме резултати од уште 8 детски ликовни конкурси на кои веќе сме испратиле дела на наши ученици, а до Нова Година имаме уште пет на кои ќе се работи во месеците кои следат.
Фокус на Детското ликовно студио “Свети Кирил и Методиј” Битола е и учеството на нашата ученичка Сирма Спиркоска на 25-тата јубилејна светска детска ликовна колонија во Евора – Португалија во периодот од 5 до 15 октомври 2024 година каде 2 години по ред освојуваме второ или трето место во конкуренција од над 15 земји учеснички со над 8О ученици – учесници” – истакна Славчо Неделковски од Детското ликовно студио „Свети Кирил и Методиј” Битола кое до сега за 2О24 година има освоено над 200 награди од светски детски ликовни конкурси од цел свет.
