Се укинува мерката за задолжително носење маски во затворени простории освен во здравствени установи, аптеки, јавни превозни средства како и установи за згрижување стари лица и лица си посебни потреби. И средношколците ќе можат да следат настава без маски, се укинува и забраната за организирање екскурзии и настава во природа. Исто така се дозволува и работата со физичко присуство на лекарските комисии за утврдување на надоместоци за попреченост и комисиите за утврдување право на помош и нега од друго лице.
Овие одлуки денеска ги усвои Владата на денешната седница откако ги разгледа препораките на Комисијата за заразни золести за олеснување на антиковид мерките и согласно подобрената епидемиолошка ситуација.
Меѓу мерките што се укинуваат е и мерката за задолжителна изолација на лица што имале блиски контакти со случаи позитивни на КОВИД-19, за кои останува мерката за носење заштитна маска во затворен простор во период од 7 дена од последниот контакт со лица со потврден КОВИД-19.
Одлуките од денешната седница стапуваат на сила со денот на објавување во Службен весник.
