Детското ликовно студио „Свети Кирил и Методиј“ од Битола ги доби резултатите од 5. издание на светскиот детски ликовен конкурс и изложба, кој се реализира во градот Фуншал, на островот Мадеира во Португалија.„Конкурсот за Мадеира 2026 започнува една година порано, односно во октомври–ноември 2025 година, кога цртежите веќе треба да пристигнат кај домаќинот.
Резултатите се објавуваат по 5 јуни, а по 5 јули се доделуваат наградите во трите возрасни категории, како и наградите за ‘избрани дела за изложба’.Детското ликовно студио „Свети Кирил и Методиј“ од Битола на овој конкурс учествуваше уште во неговото прво издание, но тогаш цртежите се загубија низ поштенскиот сообраќај во ЕУ.
„По пауза, решивме повторно да земеме учество на конкурсот, кој генерално го носи насловот „Богатствата на мојата земја“, при што секоја година се менува темата. За ова издание темата беше „Цвеќиња кои се симбол на мојата земја“.Учествувавме со 20 цртежи и сме повеќе од задоволни од резултатите. Нашите ученици Нина Пешевски и Адријан Андреев се наградени со признанието „Избрани дела за изложба“, како единствени претставници од Македонија, додека она што особено нѐ израдува е освоениот златен медал – прво место во третата возрасна категорија за нашата членка Ангела Бошевска.
На конкурсот во Мадеира се доделуваат вкупно само три награди по категорија, како и признанија за избрани дела за изложба, што го прави предизвикот уште поголем, а успехот уште позначаен, ако се има предвид дека беа оценувани над 5.000 цртежи пристигнати од повеќе од 45 земји.Очигледно, македонските ликовни цвеќиња мирисаат и до Португалија“, истакна Славчо Неделковски од ДЛС.
Иницијативата е во организација на Регионалниот секретаријат за образование, наука и технологија – Регионалната дирекција за образование и Дирекцијата за уметничко образование во Мадеира, а под покровителство на Министерството за образование, наука и технологија на Португалија.
