Изминатиот викенд младите кошаркари и кошаркарки на КК „Младост“ – Битола гостуваа во Воден, каде одиграа три пријателски натпревари со своите врсници од реномираниот грчки клуб „Едесаикос“.
Натпреварите се одиграа во спортскиот комплекс „ДАК Едесас“, кој располага со спортска сала и затворен пливачки базен.
Први на теренот настапија најмладите кошаркари, генерациите 2017/2018/2019, кои со својата игра ги воодушевија присутните во салата. Потоа следуваше натпреварот на играчите родени во 2015/2016 година, додека во последниот натпревар силите ги одмерија кошаркарите родени во 2014 година.
Иако се играа натпревари, резултатот овојпат беше во втор план. Во преден план беа стекнувањето меѓународно искуство, дружењето и создавањето нови пријателства.
„Резултатите беа во втор план, битно беше децата да се стекнат со меѓународно искуство и да стекнат нови пријатели“, изјави тренерот на КК „Младост“, Горјан Стојановски, по враќањето од Воден.
Задоволство од гостувањето на битолскиот клуб изрази и претседателот на „Едесаикос“ БЦ, Јаковос Целидис.
„Нашата младинска академија работи неполни две години со млади играчи и за повеќето од нив ова беа први меѓународни натпревари. Им благодарам на КК „Младост“ – Битола што дојдоа во Воден за стекнување искуство и нови пријателства. Сигурен сум дека идната година ќе гостуваме во Битола кај нашите пријатели“, истакна Целидис.
По одигрувањето на натпреварите, младите кошаркари од Битола го посетија познатиот воденски водопад, како и центарот на градот, со што спортското гостување беше збогатено и со дружење и запознавање со Воден.
Гостувањето во Воден претставува уште едно значајно искуство за најмладите членови на КК „Младост“, а најавата за возвратна посета во Битола отвора можност за продолжување на спортската соработка и нови средби меѓу двата клуба.
