Македонскиот инди-рок бенд Милко вечерва, сабота 18 април ќе настапи во Везилка во Битола, каде со почеток од 22 часот ќе одржи концертна промоција на своето најново, шесто музичко издание.
Станува збор за ЕР-то „Последен ден“, кое беше објавено во февруари годинава во соработка со Шарла Рекордс. Изданието содржи четири песни и означува нова креативна фаза во нивната работа.
Вечерашниот концерт во Битола ќе биде прва можност публиката во живо да го проследи новиот материјал во концертен формат, заедно со дел од песните што низ годините го формираа препознатливиот звук на Милко. Станува збор за песни што долго си го бараа местото, за звук што најдобро се разбира навечер и за сè она што останало недоискажано меѓу едно студио и една сцена. На концертот, бендот ќе го донесе сето она што со месеци, години, проби и тишини се собирало за една ваква вечер.
Бендот постои од 2008 година и годинава одбележува 18 години творештво, зад себе имајќи вкупно шест музички изданија. Со тој континуитет, Милко се вбројуваат меѓу подолговечните и автентични имиња на македонската независна музичка сцена. Новото ЕР се издвојува со освежен звук и јасно изграден авторски пристап, а во песните гостуваат Нинослав Спировски, Хана Корнети и Јоана Ристевска.
Настанот ќе се одржи вечерва, 18 април, во Везилка во Битола, со почеток во 22:00 часот. Цената на билетот е 200 денари.
