Годинашниот лауреат на наградата „Гоце Димитровски“ за најдобар млад џез-музичар за 2025 година, која традиционално се доделува во рамките на Џез фактори фестивалот во Битола, е саксофонистот Христијан Ристески – музичар кој живее и работи во Австрија и се издвојува со својот јасен и современ израз. Свеченото врачување на наградата се одржа во НУ Народен театар Битола.
„Чест и задоволство ми е да бидам овде. Оваа награда претставува признание за целиот труд што сум го вложил низ годините, како и за љубовта што ја имам кон музиката и џезот. Континуитетот е многу важен, бидејќи во оваа професија се соочуваме со многу предизвици и тешки периоди. Сепак, мора да се продолжи напред – нема застанување. Љубовта кон музиката е главниот двигател“, изјави Ристески.
Наградата оваа година доби дополнително значење преку партнерството со „Синпекс“, како поддршка за нејзиниот понатамошен развој.
„Културата не е трошок, туку инвестиција во вредности што остануваат. Поддршката на вакви настани значи создавање услови сцената да се развива и да има континуитет“, изјави Христина Фуна од „Синпекс/UTOPIA“, која ја додели наградата и додаде:
„Задоволство ми е да бидам дел од фестивалот и им честитам на организаторите за деветгодишниот континуитет. „Синпекс“ како компанија е поддржувач на културни настани, а земајќи ја предвид важноста на џезот, ние секогаш стоиме зад вакви иницијативи. Особено ми е чест што ја доделувам оваа награда на младиот Христијан. Ова не е само признание – ова е глас кој допрва ќе се слуша, а ова ќе биде само една страница од неговата музичка приказна.“
Во оваа соработка помеѓу Џез фактори фестивалот и „Синпекс“, важна улога има и личната поврзаност со џезот на Синиша Петровиќ, еден од основачите на компанијата, долгогодишен љубител на џез музиката и посетител на концерти ширум светот. Токму оваа страст придонесе за природното поврзување меѓу фестивалот, „Синпекс“ и „UTOPIA“ како дел од програмата.
Во „UTOPIA“, љубителите на џезот имаа можност да присуствуваат и на концертот на Ристески квартетот.
Визуелниот идентитет на наградата, вклучувајќи ја и нејзината форма, е дело на Ања Ристевска.
Во изминатите години, наградата ја добија: Александар Ванчовски, Филип Динев, Александар Бошков, Јован Цветковиќ, Давид Скерлевски и Теодор Јаневски – имиња што ја поставуваат јасната линија во која годинава се впишува и Христијан Ристески.
