Хуманитарната Организација „УТЕШИТЕЛ” Битола, во соработка со здружението за едукативни и хуманитарни активности Св.Нектариј Битолски, од 17.07.2023 до 23.07.2023 година, организираа духовен Летен камп за деца по Веронаука, во манастирскиот комплекс Св.Петка во с.Велгошти, Охрид.
Во склоп на нивните активностите, а заради промовирање на Православните христијански, морални и етички вредности, како основа за градење на здрави, морални и хумани личности во духот на Нашата Православна вера, се оствари овој проект за деца: ”Летен камп 2023”. На кампот имаше дваесет деца, од повеќе градови на Македонија.
На Летниот камп имаше многу активности, од духовно воспитен карактер, морално едукативен, спортско рекреативен и забавен карактер.
Имаа часови по веронаука, по пеење, по цртање, посета на цркви и манастири, учество на Свети Божествени Литургии, но и многу забава, игри и капење.
„Целокупниот аранжман во овој проект беше бесплатен, благодарение на љубовта на едно благочестиво и хумано семејство од дијаспората. Се надеваме и се молиме, сета духовна храна која по милоста Божја, дечињата ја доживеаја и почувствуваа, да им биде за јачање на нивниот духовен имунитет, за полесно да ги надминуваат сите премрежја во нивниот живот и да добијат дарови на покајание, смирение, надеж и љубов во нивните души, како и за радост и утеха на нивните семејства и сите нас. До година со Божја помош, се надеваме да имаме повторно ваков Летен камп“, вели проф. Драги Анастасовски.
