Во сабота, на 17 септември во Битола ќе се одржи Конвенција по прва помош на која учество ќе земат сите општински организации на Црвениот крст од цела држава. Нстанот започнува од 11 часот со дефиле од плоштадот Магнолија па се до Офицерски, а во текот на денот ќе има и показни вежби, како и симултациска вежба по прва помош на 24 локации по Широк Сокак каде ќе биде покажано се она што значи спасување на живот. Настанот традиционално се организира секоја година по повод светскиот ден на првата помош.
-Нашата организација секогаш работи на унапреедување на она што значи квалитет на првата помош, затоа што ние сме единствената лиценцирана организација која го едуцира населението, возачите во однос на првата помош. Затоа решивме годинава сите општински организации на Црвениот крст од цела земја да дојдат и да го покажат своето знаење, но истовремено да бидат вклучени и граѓаните во покажување, реанимација, белодробно и срцево оживување, на повреди така што на некој начин ќе ја зголемиме свеста и ќе покажеме дека првата помош е многу значаен сегмент во нашето општествено живеење затоа што можеме да спасиме човечки живот, не само на патиштата туку и секаде каде што е потребно, изјави д-р Лилјана Ристевска, претседател на ОО на Црвен крст Битола.
Граѓаните ќе имаат од прва рака можност да видат, но и да испробаат белодробно оживување, прва помош на скршеници, помош при епилептични напади и на тој начин да ги освежат своите знаења.
-Секогаш кога полагаме за возачка, добиваме сертификат за прва помош. Но сметаме и затоа Црвен крст посветено работи на тоа, секоја година имаме освежителни курсеви. Сега ќе имаме голема кампања каде ќе бидат опфатени над 2500 ученици и на тој начин секогаш покажуваме дека треба освежување на знаењата од прва помош. Неспорно е дека голем делод граѓаните знаат, но не е на одмет сите знаења да ги освежиме и секаде каде има потреба да укажеме прва помош, изјави Ристевска.
