Јонче Христовски е едно од најзначајните имиња на македонската музичка сцена. Сите ние кои имавме можност да пораснеме со МТВ, во времето кога боемството беше нераскинлив дел од културниот живот, особено на Битола, каде меаните беа институции – каде се случуваше и опејуваше животот една сосема друга стварност за разлика од денес.
Концертот на Камерниот оркестар на Битола, под диригенство на Владимир Димовски во час и половина битолчани ги врати во времето кога песната беше прав иљач.
Јонче, потекнува од Битола, како и најдаровитите гласови на македонската музичка сцена, ова е важен податок за младите. Тој беше композитор, текстописец и пејач со неверојатна харизма и впечатлива појава, никој како него не умее да го фрли палтото, да ја оживее сцената – па така, творејќи во духот на македонскиот традиционален мелос кој изобилува со специфичности, ретко публиката може да препознае која од песните кои ги испеа се негова авторска творевина или настанати меѓу народот.
Петар Младеновски, Душко Георгиевски, Ленче Кукиќ, Горан Кукиќ, Агни Авшар, Елена Андоновска, Ристо Самарџиев и Виолета Томовска заедно со Камерниот оркестар на Битола во Ценатрот за култура на Битола – направија концерт каков одамна не се случил, сплотен, громогласен, распеан…коментарите од публиката беа – ,,е вакво нешто ѝ требаше на Битола“, најверојатно затоа што каменот си тежи на местото. Песните на Јонче ги споија битолчани и во еден глас ги пееја неговите хитови: „Едно име имаме’, „Македонско девојче“, „Ој Вардаре“, „Гоце берберот“, „Ако умрам ил’ загинам“, „Свирете ми чалгаџии“, „Битолчани мераклии“….
Камерниот оркестар на Битола ги заслужува сите аплаузи за афирмација на македонските трајни музички вредности, ако се земе предвид од нивниот прв настап па досега имаат направено неверојатни тектонски движења не само на музичката сцена во Битола туку и пошироко, со оглед дека во Битола доаѓаат и посетители од другите градови за ги следат настапите.
Истиов концерт утре ќе се случи и пред скопската публика. Концертот е поддржан од Министерството за култура на Македонија.
