Деловски насловна

Влатко Деловски е човек – систем, роден во Битола, а потекнува од моштенскиот ареал на Пелагонија. Од Градежен факултет заминал да студира на Институтот за етнологија и антропологија при ПМФ, подоцна магистрирал на Институтот за македонска литература во Скопје на тема: „Културолошки параметри во првата
канонизација на светители за МПЦ-ОА“. Во моментов работи како етнолог при Завод и Музеј Битола. Исто така, работи и како консултант – надворешен научен соработник при Бигорскиот манастир „Св.Јован Крстител“. Влатко е реализиран човек во рамки на заедницата, сопруг, татко на две деца, активен велосипедист и планинар, качувач по карпести предели,.


Неговиот уметнички израз е синор меѓу световното и светото, некогаш и е невозможно да се препознае, а во тоа е суштата убавина на неговите ракописи, кои не се класична поезија. Најбитно е што секој негов збор ги буди дамарите на духовноста на човечкото битие и му влева надеж преку поука.
За да не морам да објаснувам каква е поезијата на Влатко, споделив три негови песни, за кои ве уверувам дека нема да ве остават рамнодушни…читајте.

Кога љубите

Кога љубите, ако не љубите, не велете: те сакам,
оти се познава.
Кога љубите не велете: темнината е недостаток на светлина,
оти е банално.
Кога љубите не велете: ти си ми сонце и небо,
оти љубовта не се превознесува.
Кога љубите не велете: се молам за тебе,
оти љубовта е реална помош – сега и тука.
Кога љубите не велете: ти си ми ѕвезда што сјае,
оти таа можеби е мртва, вие ја гледате само нејзината светлина која стигнала подоцна до вас.
Кога љубите не велете: тебе ти го давам срцето,
оти срцето не е за посед.
Кога љубите не велете: цел живот ќе бидам само со тебе.
Оставете простор за пристаниште и за другите души, и тие се како вас – им требате.
Кога љубите не велете: само јас трчам по тебе.
Ако се качи некој со лифтот, не значи дека е потромав во љубовта, од оној кој ита по скалите.
Кога љубите не велете: родени сме еден за друг,
оти љубовта е потрага, не се добива по раѓање.
Кога љубите не велете: јас сум различен од тебе,
туку примајте се еден со друг.
Куче да чуваш подолго време, ќе заличиш на него.
Сакајте се! Треба да сте како учкур и гаќи.
Ама кога љубите не велете: секаде ќе одам со тебе,
оти иако стеблото на пченката служи како мрежа за раст на гравот, не си седат еден другому в сенка.
Кога љубите не велете: ти си ми во срцето, ами јас сум во срцето со тебе.
Кога љубите не бидете тажни, небаре сте загрижени,
оти е лицемерно,
туку радувајте се, со пофална песна на усните.
Кога љубите не стискајте в кафе желби,
оти љубовта нема желби што се јавуваат при недостаток,
таа е полнеж.
Кога љубите, ако не љубите, не велете: те сакам,
оти тоа се познава.

Божем сте тажни

Кo ќе ги замижам очите не молчете,
божем сте тажни.
Не бидете како лицемерите со сведнат поглед,
туку продолжете ширум отворено да сонувате
и зборувајте за сите безначајности.
Не ожалостувајте се,
тагата е вашата радост без маска,
па затоа претворете ја во дела.

Земете хартија и направете бротче,
скинете весник и направете молерска капа,
нанижете ѓердан и ставете ѝ го околу вратот на некоја убаво мирисна жена,
со мирис на домат јабучар.
Ќе имам можност сето тоа да го видам.
И детето што ќе го пушти бротчето да плови по морето,
и молерот кој ќе исфарба нова детска соба,
и мирисот на жената што ќе роди нов живот.

Ко ќе ги замижам очите не тагувајте,
не стојте со сведнат поглед,
божем сте тажни,
а сал насмевнете му се на светот,
заблагодарете Му на Светиот,
оти си заминав дома, во нетлениот ми дом.

Утро

Стивнат пожар жари в очите,
сонлива свежост и плам.
Во облакосрце сонот се стиснал,
фатено утро пред да замине негде в невид.
Благословено да е засекогаш сѐ што пред мене цути,
и цвеќата што љубовта в пупки ја кријат.

meblo trejd aparati
Напишете коментар

Вашата адреса за е-пошта нема да биде објавена. Задолжителните полиња се означени со *

Претплатете се за новости

You May Also Like

Приказна: Како се бираат мајките на предвреме родените деца?

Некако, го замислувам Бог како лебди над земјата. Мајките ги избира според…

Ајри Демировски ја напиша омилената песна на Миљан Миљаниќ

Има ли некој кој ја нема слушнато песната „Битола, мој роден крај“…

Јазикот е душата на народот – Марија Недановска Пискачева за 5 Мај, Денот на македонскиот јазик

Автор: Марија Недановска Пискачева, наставник по македонски јазик На денешен ден, 5…

Биљана Т. Димко: Човек кој нема свој јазик е еднаков на човек кој нема гробно место – нема име

Пишува: Биљана Т. Димко Двата столба на македонскиот идентитет од искона до…