На 11 мај 2023 година, со пригодна свеченост беше одбележана 100 годишнината од раѓањето на великанот на македонската книжевност Ацо Шопов, на која учениците од нашата Гимназија од јазично-уметничка насока, генерација 2019-2023, во соработка со Културен и информативен центар- Битола, ја промовираа книгата со препеви на песни од Ацо Шопов – „Златен круг на времето” со поддршка од професорката по македонски јазик и литература Симона Петровска.
Свој придонес во препејувањето имаа професорката по француски јазик Жанета Наумовска и професорката по германски јазик Марија Стојановска. Ученичките Ангела Блажевска и Сања Простиженовска го изработија дизајнот на корицата.
Во предговорот кон оваа книга е запишано:
„Создавајќи го златниот круг на времето кој го поврзува веков, од раѓањето на поетот преку раѓање на зборот, до пресоздавањето на песната во поетовото перо на гледачот во пепелта, ќе продолжи да гори љубовта на огнот, а со неа како феникс ќе се преродува времето во зборот, а со зборот ние на сите јазици во светот ќе сведочиме.”
Од Гимназијата изразија огромна благодарност до Јасмина Шопова, ќерка на Ацо Шопов која ги удостои со своето обраќање од Париз, местото во кое живее денес и од каде ги поздрави со прекрасни зборови за младите креативни умови кои го чуваат споменот на поетот и неговата безвременска реч.
На настанот се обрати директорката на Гимназијата Лидија Споа на која учениците и се благодарни за целосната поддршка и можност како што рече „да бидеме чуени”.
