Центарот за европски развој и интеграција од Битола го реализира 10-тото јубилејно издание на изложбата СО ЉУБОВ ОД БИТОЛА кое се состои од 54 фотографии кои ја раскажуваат приказната за Битола од 2013 до денес. Свеченото отворање ќе се одржи на 12.09.2022, понеделник, во 20:00 часот во фоајето на НУ Центар за култура Битола.
„Со Љубов од Битола – Ода за нашата Битола низ фотографии. На годинешниот конкурс свои фотографии испратија 32 фотографи. Пристигнаа околу 90 фотографии и кога би имале неограничен фонд сите 90 би ги изработиле како приказни за бисерите на Битола кои може да си ги обесите на ѕид. Но, нашиот буџет е ограничен и како минатите девет години така и оваа стручното жири кое годинава го сочинуваа Роберт Јанкуловски , Весна Пукич и Симона Калица ја имаа задачата да селектираат двасеттина фотографии од кои три фотографии наградија со прво второ и трето место“, велат од ЦЕРИ.
Времето е четвртата димензија која единствено се мери преку фотографијата. Архитектонските симболи на еден град се сведоштво за начинот на кој луѓето го минуваат својот живот и нештата кои ги оставаат зад себе, а фотографите се тие кои ловејќи ја светлината создаваат визуелно сведоштво за тоа што е сега и овде, и се ризницата која го чува споменот за она што било и што веќе не е. „Со Љубов од Битола“ е ризница од преку 1000 фотографии за тоа како се менува Битола во изминатите 10 години и како битолчани го живеат својот живот. За оваа 2022 година стручното жири од пристигнатите 90 селектира 23 фотографии од 17 автори, кои се сведоштво за архитектонските симболи на Битола.
Реализацијата на ова 10-то јубилејно издание ја поддржаа Министерство за култура, НУ Центар за култура Битола , Општина Битола – Бит ФЕСТ и SAVA PENZISKO.