ЈП „Стрежево” – Битола склучи нов 12-годишен договор со Министерството за земјоделство, шумарство и водостопанство за користење на рибниот фонд во риболовното подрачје „Стрежево”. За разлика од претходната шестгодишна концесија, оваа важи за пошироко подрачје – од грчката граница до заштитната зона на акумулацијата.
– Новата риболовна основа предвидува измени во видот и количините на порибителен материјал, а долгорочниот период овозможува подобро планирање, инвестиции и реализација на обврските – изјави директорката м-р Вера Бешлиевска.
Таа додаде дека концесијата е значајна за заштита на водите, рибниот фонд, биолошката разновидност, животната средина, како и за развојот на спортскиот и рекреативниот риболов.
Сите заинтересирани граѓани може да извадат дозволи за риболов од понеделник во Управната зграда на „Стрежево”. Како нов член на Македонската риболовна федерација, „Стрежево” овозможува и издавање државни дозволи и легитимации за риболов.
