Во големата сала на Центарот за култура во Битола се одржа специјална проекција на „Јон Вардар против Галаксијата“, првиот македонски долгометражен анимиран филм. На проекцијата беа присутни и режисерот Гоце Цветановски, арт директорот на филмот, битолчанецот Михајло Димитриевски познат како Тхе Мичо, како и дел од екипата која го анимираше филмот.
Јон е потпросечно интелигентен човек од Земјата. Зарк е нарцисоиден мегаломан – робот кој патува низ вселената и собира примероци за својата интергалактичка Зоолошка градина. Кога двајцата ќе се спојат, ќе настане хаос. Двајцата ќе ги здружат силите за да го заштитат најопасното оружје во Галаксијата да не падне во погрешни раце. Необичното дуо ќе тргне на вселенско патување исполнето со вонземјани, чудовишта, црни дупки, и можен крај на севкупната егзистенција.
„За мене многу значи што се смеете и штом сте си заминале насмеани, значи сме завршиле добра работа. Голема благодарност до битолчанецот, Мичо, овој филм беше инспириран од неговата имагинација, сите овие негови ликови кои веќе беа создадени од него, беа „виновни“ за да настане приказната“, изјави режисерот Гоце Цветановски веднаш после завршувањето на проекцијата.
Веднаш потоа во малата сала продолжи дискусијата со екипата. Филмот моментално се прикажува низ Македонија, беше промовиран во Шпанија и Бразил каде предизвика огромен интерес, а се најавува и негово прикажување и не само во соседните земји, туку и малку пошироко.
„Одлични беа реакциите и после филмот излегуваат со позитивна мисла, и тоа ни беше целта, Иако филмот крие посериозна позадина, дека треба да се мисли позитивно и има антивоена порака, но целта беше да се направи еден лежерен филм кој може да го гледаш без многу филозофирање и да се забавуваш, тие час и половина да ги заборавиш грижите и да се смееш колку можеш. Гледавме да има хумор и шеги и за деца и за возрасни“, рече Цветановски.
Тхе Мичо е познат илустратор и арт директор по повеќе проекти, а овој филм се надева дека ќе успее да поттикне некого да ја извади својата креативност и желба за уметност на површина.
„Многу е битно да има заинтересираност за ваквите креативни работи, битно е барем некој од публиката да почувствува дека не мора да се занимава со политика, не мора да биде правник, можи да биди евентуално уметник. Особено во овие тешки времиња за кретивноста која е потисната и од глупавата технологија која ја користиме, а и од општиот невкус и некултура“, изјави Михајло Димитриевски – Тхе Мичо, арт директор.
„Јон Вардар против Галаксијата“ е најголемиот копродукциски проект на Балканот. Изработен е со финансиска поддршка од Агенцијата за филм на Македонија, а има копродукции во Унгарија, Бугарија и Хрватска.
