Изложбата „преВРЗИНО“
На 23 ноември 2024 година, со почеток во 19:00 часот, во Ликовниот салон на ДЛУБ ќе се отвори изложбата „преВРЗИНО“. Оваа изложба опфаќа дела од различни циклуси на Анчевски, каде пастозните слоеви материјал на монохроматските позадини создаваат уникатни шеми и форми.
Делата на оваа изложба ќе ги поведат посетителите на патување низ космички, физички и биолошки периоди, претставувајќи праисториски пејзажи и соѕвездија, но истовремено ќе им навестат нови митологии. Анчевски преку своите дела ја преиспитува врската помеѓу гестот, дамката, и нивните трансформации, создавајќи простори кои истовремено ја напуштаат традиционалната слика и се отвораат кон неограничени можности.
Стефан Анчевски, визуелен и мултимедијален уметник од Куманово, е едно од најистакнатите имиња на современата уметничка сцена во Македонија. Роден во 1993 година, Анчевски дипломирал графика на Факултетот за ликовни уметности при Универзитетот „Св. Кирил и Методиј“ во Скопје.
Со реализирани десет самостојни изложби и учество на повеќе од 150 групни изложби во земјата и странство, Анчевски е активен член на Друштвото на ликовните уметници на Македонија (ДЛУМ) и (ДЛУБ). Добитник е на повеќе награди, меѓу кои „TrashForArt“ во 2014 година и „Let’s bring justice closer to citizens“ во 2023 година.
„Сето она што било не е веќе, додека пак сето она што ќе биде сè уште не е.“ Анчевски продолжува да ја истражува и редефинира уметноста, оставајќи простор за интеракција помеѓу материјалот, просторот и гестот. Не пропуштајте ја оваа уникатна можност да се запознаете со делата на еден од најперспективните уметници од Македонија.
