Утре, 16 август во Центарот за култура Битола со почеток од 19 часот ќе се одржи Гала концерт на музика од филм, кабаре и мјузикл заедно со Камерниот оркестар на Битола како завршница на 23. Интернационален музички фестивал MUSICLAND.
Натпреварувачкиот дел од фестивалот се одржува во Охрид, а 15-те најдобри интернационални натпреварувачи ќе настапат на гала концертот во Битола.
Директорот на фестивалот, Тони Алексовски на битолчани им ветува незаборавна вечер каде интернационални изведувачи, кои се големи музички имиња во своите земји ќе приредат шоу за уживање со песни од филмска музика, кабаре и мјузикл.
Карактеристично е тоа што ова е еден од единствените фестивали во Европа кој има ваква концепција и ваков репертоар на натпреварување.
Имено, учесниците прво настапуваат со поп песна на мајчин јазик или поп песна на било кој друг странски јазик и песна од категоријата филм, кабаре и мјузикл.
Фестивалот има 5 возрасни категории, првата категорија е од 5-9 годишна возраст, втората е од 10 до 12-годишна возраст, третата е од 13 до 15-годишна возраст, четвртата од 16 до 19-годишна возраст и петтата од 20 до 35-годишна возраст.
Оваа година на фестивалот има над 50 учесници од 18 држави.
