Според официјалните резултати од 56-тиот детски ликовен конкурс кој се организира без прекин во градот Швед во Германија под насловот “FLOW” 9 ученици на Детското ликовно студио “Свети Кирил и Методиј” Битола се добитници на највисоките награди и признанија.
Кон домаќинот кој повеќе од 25 години детскиот ликовен конкурс го организира и како меѓународна манифестација пристигнале над 5.000 дела од над 23 земји од кои Македонија за прв пат зема учество преку Детското ликовно студио „Свети Кирил и Методиј” Битола како единствен претставник досега.
Интернационалната жири комисија селектирала 1.500 детски ликовни цртежи од кои 700 се на број оние кои ќе бидат дел од официјалната поставка за 56-тото издание и во кои се доделуваат согласно годишната возраст низ 10 категории од 4 до 20 годишна возраст и соодветни награди од кои најголеми се топ 5 во својата категорија и 10 најдобри индивидуални пристапи во ликовното изразување.
Покровител на конкурсот, а воедно и Претседател на жири комисијата е Градоначалникот на Швед што е традиција стара 55 години.
Од Детското ликовно студио „Свети Кирил и Методиј” Битола наградени се: Јана Стојановска [ 7 години ] – Мила Атанасовска [ 8 години ] – Кристијан Николовски [ 8 години ] – Јана Кировска [ 9 години ] – Ивана Неданова [ 12 години ] – Лина Вржалковска [ 12 години ] – Стефанија Милошевска [ 14 години ] – Анастасија Наумчевска [ 15 години ] и Меланија Кондовска [ 15 години ].
Организаторот го извести и Детското ликовно студио „Свети Кирил и Методиј” Битола дека годинешниот успех е еден од позабележителните особено од страна на едно школо кое претставува нова земја – држава.
„Ние сакавме да пратиме на работилниците и дел од поголемите ученици кои добија награди, но согласно финансиите и состојбите решивме дека возраста не смее да е пречка помал ученик со поголем успех да не патува и си ја подигне својата награда. Затоа и само ќе ги примиме наградите.
Воедно, бидејќи во периодот кога ќе е церемонијата на свечено доделување ние сме во Тирана – Албанија каде по проект од Министерството за култура во КИЦ на Македонија во Тирана ќе го одбележиме и 8-ми Септември Денот на независноста, решивме оваа година во тој месец таа активност да ни е приоритет.
Наградите од работата и огромниот уметничко ликовен капацитет на нашите членови си доаѓа самиот по себе и ние сме задоволни што оваа година скоро и да нема конкурс и изложба на која не сме присутни, а со тоа и наградени” – истакна Томислав Стерјев – координатор по ликовни активности од ДЛС „Свети Кирил и Методиј” Битола.
