Директорот на Jazz Factory Festival – Bitola, проф. Сашо Поповски, по вторпат е дел од International Partners Council на Jazz Juniors – Kraków, Полска, по повод 50-тото издание на еден од значајните европски џез фестивали.
Од 1 до 5 октомври, Поповски ќе учествува во работата на меѓународниот фестивалски совет, каде што ќе има можност за размена на искуства, воспоставување нови контакти и отворање можности за идни соработки со претставници на меѓународната џез сцена.
„За мене, ова учество не е само лична чест, туку пред сè можност за претставување на македонската џез сцена, Битола и нејзиниот културен потенцијал пред меѓународната џез заедница. Како директор на Jazz Factory Festival – Bitola, продолжувам да работам на создавање мостови меѓу македонските музичари и меѓународната џез сцена – преку соработка, размена, вмрежување, нови партнерства и отворање можности за развој и промоција на македонските уметници“, истакнува Поповски.
Посебен фокус за време на престојот во Краков ќе биде и презентацијата на Националната џез платформа на Македонија – иницијатива чија цел е поврзување на македонските џез музичари, Музичката академија при УГД – Штип, фестивалите, институциите и организациите, како и нивно поактивно вклучување во европските и меѓународните џез мрежи.
Учеството на Поповски во International Partners Council претставува можност и за дополнително промовирање на Битола како град со значаен културен и фестивалски потенцијал, но и за претставување на македонската џез сцена пред професионалци и организатори од Европа и пошироко.
„Од Битола до Краков. Од Македонија кон Европа и светот. Од фестивалска сцена кон нови партнерства и можности“, порачува Поповски.
Тој додава дека македонскиот џез има потенцијал за поголемо присуство на меѓународната сцена.
„Верувам дека македонскиот џез има што да понуди на меѓународната сцена – со својот талент, креативност, авторски израз и енергија. Jazz Factory Festival продолжува да гради мостови. За македонскиот џез да биде слушнат, препознаен и поврзан со светот“, додава Поповски.
