Гимназијата „Јосип Броз Тито“ Битола со четири екипи, машката и женската екипа во ракомет, како и тимот за пинг понг и тимот во шах ќе учествува на Балканските училишни спортски игри кои ќе се одржат од 12-ти до 16-ти јуни во Охрид.
„Како шампиони на Гимназијадата одиме на меѓународно ниво, многу повисоко“, вели професорот Михајло Силјанов.
Федерацијата на училишен спорт на Македонија со поддршка на Агенцијата за млади и спорт ќе организира ОТВОРЕНИ БАЛКАНСКИ УЧИЛИШНИ СПОРТСКИ ИГРИ – „ОХРИД 2022“. Целта е зближување на младите спортисти од Балканот, создавање нови познанства, премостување на разликите и обид преку спортот да ја реализираат идејата за ОТВОРЕН БАЛКАН.
На игрите учество ќе земаат околу 450 ученици-натпреварувачи од најдобрите средни училишта од Македонија, Србија, Албанија, Косово, Бугарија, Црна Гора и Босна и Херцеговина. Натпреварите ќе се одржат во повеќе дисциплини.
