АД ЕСМ, како општествено одговорна компанија, ги следи современите трендови и потреби од електро-енергетскиот сектор, вложувајќи во развој на нови стручни профили. Со денешното доделување на вкупно 11 стипендии е продолжена долгогодишната соработка со Универзитетот „Св. Климент Охридски“ – Битола, поточно со Техничкиот факултет.
Покрај директните инвестиции, АД ЕСМ индиректно вложува и во идниот кадар. Денес беа доделени пет нови стипендии, а истовремено беа обновени и шест договори за стипендии на студенти од Техничкиот факултет – Битола. Стипендијата изнесува 80.000 денари годишно, односно по 8.000 денари месечно во текот на 10 месеци. Право на продолжување на стипендијата имаат студентите кои го задржале потребниот критериум – просек не помал од 8. Истите услови важат и за новите пет стипендисти, со кои АД ЕСМ денес потпиша договор во просториите на Подружница РЕК Битола.
Техничкиот факултет во Битола со своите наставни програми континуирано се усогласува со потребите на електро-стопанството, поради што новите пет стипендии се наменети за студенти од отсеците: мехатроника, електроенергетски системи и обновливи извори на енергија. Обновените шест стипендии се за студенти од студиската програма машинство.
„Нашата визија како компанија е континуирано инвестирање во производствените капацитети и во соодветен стручен кадар кој ќе управува со нив, со цел непречено функционирање, одржливи резултати и стабилен енергетски систем во државата“, истакнуваат од АД ЕСМ.
